Mir si raus

 

Mir si raus

 

“Udeskole” an Dänemark, “Uteskole” an Norwegen, “Outdoor Learning” a Schottland, “Draußenschule” an Däitschland, Éisträich an der Schwäiz, la “Classe dehors” a  Frankräich, l’”Ecole dehors” an der Belsch, “Apprendre au-delà des murs” am Kanada, … A ville Länner gëtt probéiert, d’Schoul ëmmer méi mat dem Liewen dobaussen ze verknäppen an d’Schoul och mol aus dem Schoulgebai erauszeféieren - an ëmmer méi Klasse probéieren dat  zu Lëtzebuerg.

Dobaussen ze léieren huet bewise positiv Auswierkungen, ënner anerem op déi physesch a psychesch Gesondheet vun de Kanner, op hir Sozial-, Selbst- a Saachkompetenz, souwéi op hir Naturverbonnenheet (“Draussen-Lernen” Jakob von Au, Rolf Jucker, 2022).

Och fir Iech als Léierpersonal kann d’Schoul dobaussen sech positiv auswierken: Dir léiert d’Schüler op eng nei Aart a Weis kennen, d’Bezéiunge gi gestäerkt.

D’Mir si raus-Wochen hunn als Zil, de Schoulen an de Kanner Loscht ze maachen, eng Rei Léieraktivitéiten, déi un de Plan d’études gebonne sinn, no baussen ze verleeën. D’Iddien an d’Virbereedungen dozou kritt Dir ganz praktesch an deenen nächste Wochen hei um Site presentéiert. 

Dir hutt d’Gewunnecht nach net, fir Schoul dobaussen? Hei  schonn e puer Tipps :

  • Sicht Iech eng flott Plaz dobaussen eraus, déi ee ganz einfach ze Fouss kann erreechen, sou dass d’Aktivitéit dobaussen och mol spontan ka stattfannen. De Schoulhaff, d’Duerfplaz oder de Park bidden sech och fir eng Léieraktivitéit dobaussen un.
  • Plangt Är Aktivitéit dobaussen esou, dass d’Kanner déi meeschten Zäit a Beweegung sinn.
  • Plangt genuch Zäit an. Dobausse gëtt et ëmmer vill Interessantes ze entdecken.

An als Bonbon kann all Klass, déi bäi de Mir-si-raus-Woche matmécht, an deenen anere weist, wat se gemaach huet, un engem Concours Deel huelen a deen een oder anere flotte Präis gewannen.

Dofir kommt an deenen nächste Wochen hei op de Site kucken; geschwë gitt Dir méi gewuer. Fir weider Informatiounen ze kréien, kënnt Dir eis gär  op mirsiraus@men.lu kontaktéieren.